蘋果日報 | APPLE DAILY
› 選擇地區
三藩市
紐約
洛杉磯
其他美國地區

分手爆點 嫌楊崢老煩貪 老母鬧黃宗澤:你有兩個阿媽啦!

最後更新: 0804 19:51 / 建立時間 (HKT): 0227 00:00

二月初,突然爆出黃宗澤( Bosco)與四十二歲過氣名模楊崢發展姊弟戀三個月,消息曝光後,人緣負數的楊崢連日來遭同行圍剿,負面新聞浪接浪,兩人亦沒有再見面。
「崢澤戀」來得快散得急!據知,向來孝順的 Bosco,曾與母親為楊崢吵大鑊,澤媽嫌楊崢又老又煩又貪,與 Bosco爭執時更拋下一句「你有兩個阿媽啦」。在阿媽與速食女友間選擇, Bosco最終棄老女,保老母,與楊崢玩完。

當煲水新聞

去年十一月,傳出與胡杏兒分手多時的 Bosco,終於的起心肝,與一名內地富商千金 Tina發展,本刊也曾目擊澤媽與 Tina共聚,據知,支持兒子追求 Tina的澤媽,會不時打電話約 Tina,為兒子製造機會。
到今年二月初,卻突然爆出 Bosco與楊崢拍拖,澤媽初時以為是煲水新聞而沒有放上心,直到見到報紙登出兩人在深灣遊艇會情深一吻照片,她才如夢初醒。
「 Bosco媽咪覺得 Tina有教養,屋企背景又好,好想撮合 Bosco同 Tina,可惜 Tina唔鍾意男仔吊兒郎當,就算 Bosco力追,最後都係拒絕。 Bosco媽咪一心仲諗住再製造多次機會俾個仔試吓,點知就爆咗同楊崢拍拖單新聞出嚟,佢初時以為係煲水新聞,都冇放喺心,連問吓個仔都冇,直到見到佢兩個嘴對嘴錫張相,先知道係真!」知情者說。

衰事傾巢而出

據知, Bosco親自向母親交代跟楊崢拍拖後,澤媽根本無法接受,一來向來孝順的 Bosco事前無跟她提過同楊崢拍拖,二來見對方比自己兒子大九年,還有楊崢倒瀉一籮臭史,又高調晒戀情,印象有壞無好。為此,兩母子關係變僵。
「 Bosco同楊崢拍拖,佢媽咪好唔開心,佢話 Bosco一直都好尊重佢,鍾意咩女仔都會同佢講唔隱瞞,但從來都冇提過楊崢呢個人。
「最差係楊崢啲新聞唔係撬人男友老公,就係貪錢周圍黐,全部衰嘢俾人一次過摷晒出嚟。以前 Bosco同杏兒拍拖都唔會咁,同楊崢一齊就變咗另一個人,嘴又俾人影到,借車揸又影到,最慘係老人家都俾人跟,搞到佢車唔敢揸,鋪頭又唔可以返,所有麻煩都係楊崢惹起。」知情者說。

趕落車

為製造確認澤嫂身份,楊崢故意揸住黃宗澤的古董車遊街示眾,可惜櫈未坐暖就要落車。
這架以莫扎特著名歌劇《 Figaro的婚禮》為名的復刻古董車,是日產 91年出品,由於是高齡品種,現售價約九萬元。
至於《 Figaro的婚禮》是一齣輕喜劇,變心的人回心轉意,相愛的人大團圓結局,做了不足三星期「車主」的楊崢,卻得不到像該劇劇情般的祝福。

嘈交寸到爆

對楊崢的不滿,除了因為她帶來太多麻煩及有太多負面新聞外,更主要,是因為楊崢年紀比 Bosco大九年。「老人家思想點都保守啲,好難接受個仔有後生嘅唔追,走去同個大自己九年嘅,仲唔知同過幾多個男人一齊嘅女人拍拖。 Bosco媽咪未試過同個仔嘈交,以前有乜事最多都係哦兩句,今次係嬲,仲嬲到話『唔驚啦,你而家有兩個阿媽,冇咗我呢個阿媽,仲有佢做你阿媽!』 Bosco都估唔到自己阿媽講到咁寸,所以佢都好嬲,兩母子跟住唔睬。」知情者說。

速戀

藝人拍拖難免成為大眾話題,壓力下受創甚至速死的感情關係,比比皆是。

林峯 潘霜霜

11年與內地奀星潘霜霜的床照流出,差點令林峯一鋪清袋;為保形象,林峯向傳媒認曾戀霜霜,但同時宣布這段幾個月貨仔戀情,因性格不合分手。

許亦妮 盧啟邦

去年許亦妮拍《喜愛夜蒲 3》時被爆與太陽集團有米高層盧啟邦撻着,被拍得二人同車談心,幾日後,男方被爆有正印女友,許亦妮變小三,玩完!

余文樂 吳雨霏

去年初,余文樂與吳雨霏先香港後倫敦拍拖斷正,繼而公開戀情,可但撻着大半年,便宣告分手。


一面倒反對

事實上,除了澤媽嚇親, Bosco身邊朋友亦對「崢澤戀」一面倒投反對票。
Bosco自知與楊崢再難繼續,最終選擇提出分手,氹番一手養大自己的親母。
「 Bosco真係好孝順媽咪,一定會揀自己阿媽啦,況且楊崢啲新聞愈出愈可怕,傳媒寫嘅唔算精彩,仲有啲係其他人親口同 Bosco講,佢唔係傻仔! Bosco媽咪知個仔肯同楊崢分手,不知幾開心。不過佢唔敢點出街,免得俾傳媒跟住。」知情者說。

女友生日冇影

Bosco與母親冰釋前嫌,惹下不少仇口的楊崢,則受到多位同期出道的女模,如歐陽妙芝、陳嘉容、黃佩霞等企出來數其不是。
上星期五(二十一日),在商台放工後,楊崢便以私人理由向商台無限期請假,龜縮避走,至今恍如人間蒸發。星期日(二十三日)是楊崢四十三歲生日,原以為男友 Bosco會與她慶祝,可惜事與願違。
沒有為女友慶祝拍拖後首個生日的 Bosco,當晚選擇與苗僑偉夫婦等去澳門出席活動。被傳媒包圍下, Bosco沒有正面回應分手一事,只要求外界多給雙方空間,當問到借給楊崢的古董車是否已收回?他直接說:「係,借車還車好正常。」
問 Bosco是否媽咪不喜歡楊崢?他說:「屋企人唔使拎出嚟講。」

個個 dislike

「崢澤戀」快來快去,也是最不被祝福的一對,尤其女方,日日被人鬧爆,人品有幾好,可想而知。

鬧冇品

與楊崢同期出道的歐陽妙芝,自「崢澤戀」曝光後,直指女方因曾硬撬黃佩霞外籍男友,從此在模界受杯葛,成為獨孤精。

著舊鞋

傳被黃宗澤視為女神的陳嘉容,在模界唱爆楊崢著她舊鞋,令二人曾撻着一事公告天下。

藐失場

在模界是楊崢後輩的莊思敏及姚書軼,均指證楊崢曾借意失場 no show,狠批她唔專業。

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載