蘋果日報 | APPLE DAILY
› 選擇地區
三藩市
紐約
洛杉磯
其他美國地區

羅傑承撤資娛樂搞酒店

最後更新: 0804 19:52 / 建立時間 (HKT): 0320 00:00

華人置業主席「大劉」劉鑾雄,以及南華足主羅傑承,上週五(三月十四日),被澳門初級法院裁定行賄澳門運輸工務司前司長歐文龍及洗黑錢罪名成立;各判監五年三個月,二人正式上訴後各有動作。大劉辭去華置主席、行政總裁及執行董事三項職務,交由長子、副主席兼非執行董事劉鳴煒全面接任。據了解,本週一(十七日)開記者會發聲明的羅傑承,原來亦有計劃唔玩再沾手娛樂生意,全力進軍澳洲搞酒店。

澳洲建酒店

南華足主羅傑承前日在公司舉行三分鐘記者會,不設發問時間,只讀出早已擬定好的聲明,正式提出上訴及澄清有報導指他在九九年捲入澳門一宗「濫用信任」案件,已於○三年獲判勝訴,現下將會集中精神,處理上訴一事。
判決後,連日來未有露面的羅傑承,表面上沒有任何大舉動,但據了解,他已經部署將生意基地轉移,逐步淡出香港娛樂事業,轉往澳洲、菲律賓等地建酒店,發展地產項目。

老婆冇興趣

「羅生一直都鍾意做娛樂,曹格約滿離開 BMA後,佢都繼續落重本做 Gin Lee,不過使咗幾百萬做宣傳出唱片,到今日都係無聲無氣, Gin年中約滿,公司咁嘅環境,佢應該都係自然流失唔會再續約。至於組合 Yellow只係業餘性質, BMA只係幫佢哋發行唱片唔係 management,所以公司基本上冇晒 artist。
「本來羅生都有諗過再簽人俾老婆搞,不過羅太冇興趣,只係對南華(足球隊)有感情,之後好有可能只係搞球隊唔做娛樂,雖然佢哋話一切照舊,不過 BMA都係名存實亡。」知情者說。經歷過大起大落,這年多來雖然一直官司纏身,但見慣風浪的羅傑承依然搵到商機,並已有計劃在澳洲建大型住宅屋苑。
「喺香港做娛樂圈冇錢賺,羅生呢幾年其實都開始有其他投資,之前去過澳洲同菲律賓,打算喺嗰邊起酒店,仲會搵啲新區搞大型屋苑,佢留香港嘅時間亦會愈來愈少。」知情者說。

大起大落

54歲的羅傑承於澳門出生,九十年代開始轉戰香港,投資港澳地產、飲食、娛樂及體育事業。 90年代初退出與黃百鳴合組的永高電影公司,其後公司清盤。 92年至 94年曾任南華體育會足球部主任,並於 06年再度出任至今,帶領球隊由降班搖身一變成「三冠王」,又投資南華及天水圍飛馬足球隊,令他在本港足球壇成為一時佳話。
99年,羅傑承於澳門被控偽造文件及欺詐舊公司一百萬元,被判濫用信用罪名成立,當時判囚三個月,但據他日前澄清,這宗官司最終上訴得直。
惹官非也惹禍的他, 95年離開尖沙咀一間夜總會時,被數名兇徒隨街追斬,身中三刀,雖沒生命危險,但右手四條手筋被斬斷。
大難不死,近幾年生意愈做愈多,旗下博美設有藝人管理公司、電影公司及出版社,他又大鑼大鼓開設卡拉 OK連鎖店 Red MR,做埋馬主生活風光,直至牽涉今次澳門歐文龍貪污案。

入局有阻力

名下擁有兩隻一班馬,去年贏到開巷,成為贏得最多獎金馬主的羅傑承,更早已申請做馬會董事。
「呢幾年羅生喺馬場好活躍,亦一早申請咗入馬會做董事,後來突然爆咗單嘢(官司),其他董事即刻 hold住,要等佢搞掂晒知道結果,先會再決定俾唔俾佢入局。馬會嘅人好要面,今次單嘢搞到咁大,佢哋都話要審慎啲處理。」知情者說。
相比照舊出入褔臨門食飯任影的大劉,再上訴的羅傑承明顯低調,當日跟老婆梁芷珊出席完三分鐘記者會後,第一時間離開,又刻意安排名下的七人車不斷出入,避過在門口守候的傳媒。

前度陳加玲週二突發聲明

陳加玲於 91年拍攝羅傑承有份投資的電影《黃飛鴻笑傳》而傳出緋聞, 94年羅離婚,並公開二人戀情。 98年二人分手,羅傑承於 02年跟梁芷珊結婚並育有一女。不過陳加玲表示二人之間仍有錢銀轇轕,更多次發聲明暗示曾遭男友欺騙,羅傑承則拒絕回應。

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載