蘋果日報 | APPLE DAILY
› 選擇地區
三藩市
紐約
洛杉磯
其他美國地區

理大生專造 CM耳機

Vitas( 21歲)
香港理工大學物業管理學系 Yr. 1
Vitas因愛聽舞曲及搖滾樂隊,故較喜歡偏重低音的耳機,「客製耳機可按客人對音色嘅喜好去調節音質,如果鍾意聽流行曲,可以揀偏重高音嘅耳機。」
最後更新: 0803 05:25 / 建立時間 (HKT): 0420 00:00

年輕人追求個性設計的產品,自選顏色、圖案等客製服務近年深受歡迎。就讀理工物業管理學系的 Vitas,因對高質耳機略有研究,被 CM(客製)耳機的訂購服務燃起其創業念頭,故找朋友介紹耳機師傅及配件供應商,開設 Uni-Audio網店,為客人訂製個人化耳機,吸引一班二、三十歲的年輕人支持。

時下產品設計講求獨一無二,訂造 CM耳機正能滿足追求與別不同的客人, Vitas表示:「客人可自選顏色、圖案,或選擇唔同金屬嘅耳機線去提高音質,令聲音更細膩。我哋嘅耳機形狀暫時係統一嘅公模,如果按每個客人嘅耳形去開私模,製作較複雜,成本太高,我哋採用嘅耳棉係記憶棉,可以 fit番唔同耳形,戴上去都幾舒服。」
16年 2月, Vitas開設了客製耳機網店 Uni-Audio,在 facebook及 ig接訂單,「客人喺網上填好訂購表格後,我會用 WhatsApp同佢確定顏色、印字、耳機聲元及金屬線,然後收取最少一半嘅訂金。耳機會交由內地嘅師傅去製造,金屬線由我向歐美或內地供應商訂購。如果揀現成顏色、裝飾唔多,一般 1至 2星期就可以取貨,較複雜嘅設計就要等 3星期,一副耳機平均消費 6、 7百,亦有客人訂超過$4,000嘅耳機。」 Vitas至今已完成近 60張訂單,客人以 20至 30歲的年輕人居多,月賺近$10,000。

比賽前要聽歌

曾是港隊田徑代表的 Vitas,對耳機的音質有講究,「我想喺比賽前夕 keep住興奮嘅心情,會一直聽住節奏強烈嘅音樂,加上平時練習想專注啲又會戴住耳機聽歌,所以我會買質素好啲, base勁啲嘅耳機。後來我喺網上發現 CM耳機,就開始研究呢項訂做服務,同時又認識咗幾個喺內地造 CM耳機嘅網友,發覺營運流程唔係好複雜,就託朋友介紹耳機師傅,籌備開網店接訂單。」
市面上的耳機大品牌,會花巨額金錢去包裝及宣傳,令成本增加, Vitas指其品牌有價格優勢,「我較少宣傳上嘅開支,成本就係材料、師傅手工費,定價有空間調低啲。相同質素嘅耳機,我嘅售價比大品牌低一半,令客人用較平價錢享受高質音色。」

靠口碑宣傳

Uni-Audio沒有大品牌的知名度,最初較難說服客人花 6、 7百去買一副耳機。「我搵港隊嘅朋友幫手,將用後感放上 facebook及 ig作推介,之後有客人嚟訂做,佢哋覺得耳機嘅質素好,價錢合理,自然會向朋友推薦,口碑係最有效嘅宣傳方法,熟客介紹佔咗生意額嘅 4成。當然,我亦有喺社交網絡落廣告,增加曝光率。」
為了確保產品質素, Vitas有提供周詳的售後服務,「貨品以見面交收,客人可以即場試戴耳機,如果 7日內有任何問題,可以將耳機交還,我再搵師傅維修。不過,暫時都未出現過產品有問題嘅訂單,因為國內嘅師傅出貨前都會檢查幾次,確保音色冇問題。」 Uni-Audio的訂單數量穩定, Vitas在畢業前會繼續經營網店,希望能建立自己的耳機品牌。

Audrey(客人):
耳機可以揀顏色及印字,設計全由自己話事,加上音質唔錯,訂做嘅價錢合理。

facebook@Uni-Audio

撰文:杜曉婷
攝影:陳子禮(部分圖片由被訪者提供)

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載