蘋果日報 | APPLE DAILY
› 選擇地區
三藩市
紐約
洛杉磯
其他美國地區
馬上成為壹會員

理大生 創本地𡃁界潮

嘉遜( 23歲)
香港理工大學 產品工程及市場學系 Yr.4
嘉遜(左起)與豆釘、 Michael及阿飛等共 6位拍檔合作營運 Fumble,他們指品牌每年推出冬夏兩季的服飾,嘉遜表示:「我哋嘅設計以黑、白、灰及藍等大路顏色為主,今季 detail位會用紅色、紫色去玩吓撞色。」
最後更新: 0803 05:26 / 建立時間 (HKT): 0518 00:00

自年輕人愛 H&M、 Uniqlo等外國品牌,本地鮮有被追捧的年輕潮牌。就讀理大的嘉遜,因為學生會設計紀念 tee,故啟發他創立原創時裝品牌的念頭, 13年中,他聯同朋友 Michael、豆釘及阿飛等 6個大男孩成立 Fumble,並於 facebook及 ig建立網店,出售自家設計的服飾, 16年更設立了官方網站,成為本地受歡迎的網上時裝品牌之一,吸引了一班 90、 00後的支持。

Fumble由 6個大男孩建立,大家都沒有時裝設計的背景,嘉遜說:「我哋最初真係好似 Fumble個名一樣,靠自己去摸索點樣去設計、搵生產商及宣傳,慢慢去建立一個時裝品牌。」
年輕人習慣網購, Fumble也以網店經營, Michael說:「𠵱家客人可以直接去官網落訂單,用信用咭或 PayPal畀錢,交收方法以郵寄為主,一般 3至 4日就可以收到貨。 Fumble嘅衫風格偏日系,產品有 tee、布袋、牛仔褲及飾物,有文字或數字嘅 tee及布袋最受歡迎;另外,玫瑰圖案嘅 tee都賣得好好,我哋仲有出牛仔褲及帽等 items。」 Fumble的產品售價由$200至$600不等,客人以中學生及二十多歲的年輕人為主,平均月賺 2萬。

設計 tee起家

6子皆是對打扮講究的男生,當中嘉遜更有興趣於設計,「 3年前,我參加咗學校嘅 SU,當時想整一件代表到學生會嘅 tee,自己設計圖案拎去印,結果大家都好鍾意個 print,令我想嘗試做設計,於是搵埋 Michael、豆釘同阿飛呢幾個老友,一齊做服飾設計。」
13年中,他們先在 facebook及 ig開設網店,最初以 tee作主打商品, Michael說:「有親戚喺採購公司工作,向我哋介紹咗一啲成衣外貿公司,願意接批量較少嘅訂單,每次落 50至 100件都可以。 Tee嘅設計會中性一啲,男女都適合,最初我哋造由 XS至 L4個 size,後來發現女仔鍾意買大件啲嘅 tee當裙着,就開始唔造加細碼。」
網絡宣傳盛行,豆釘指在 facebook、 ig落廣告的品牌實在太多,故他們改在論壇登廣告,「社交平台上太多同類型嘅時裝廣告,我哋今年開始改喺香港討論區等論壇出廣告,點擊率比 facebook、 ig多 2成,吸引更多人瀏覽我哋嘅官網,入嚟揀吓衫,生意亦多咗 1成。」

布袋佔 3成生意

經營了 3年時裝網店,嘉遜與拍檔不斷汲取經驗去改良設計,阿飛說:「之前有一頂鮮紅色嘅 cap帽因顏色過於鮮豔,銷情唔太理想,我哋之後設計帽時都會用沉色撞鮮色,等客人覺得易 carry啲。我哋上年開始主力推布袋,客人買布袋好少考慮啱唔啱 size嘅問題,會好爽快咁落單購買,𠵱家布袋佔約 3成營業額。另外,我哋亦主動搵手表品牌 Ross Rino傾合作,出 crossover手表,第一批貨 200隻已經賣晒。」
畢業在即的嘉遜希望投身設計業,他說:「品牌一定會繼續經營,𠵱家亦搵緊產品設計嘅工作,希望喺行內累積實戰經驗,同班兄弟將 Fumble做得更好。」

客人 Kelly:
Fumble嘅設計好易襯,質地好,唔似淘寶洗兩洗就變晒形;我同啲 friend都有用佢哋嘅布袋, size適中,夠擺 A4筆記。

http://www.fumble.com.hk
facebook@Fumble

撰文:杜曉婷
攝影:劉宇軒(部分圖片由被訪者提供)

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載