蘋果日報 | APPLE DAILY
› 選擇地區
三藩市
紐約
洛杉磯
其他美國地區

少年股神唔覺離地》4年前「退休」 36歲梁宇恆:好多年輕人羨慕我

183,829
最後更新: 0825 07:07 / 建立時間 (HKT): 0824 06:00

有冇諗過36歲嘅時候,你有幾多財富呢?有「少年股神」之稱嘅梁宇恆(Adia),就已經擁有千萬身家。自少家境富裕嘅佢,衣食無憂,不過97年一場金融風暴就令Adia「家道中落」,亦從此改變佢一生,「自小家境唔差,屋企有幾層樓係西半山,係上環有兩間金舖。

本來環境好好,可惜喺97年因為炒股票同樓,輸到爭銀行八位數,嗰年就移民加拿大,係嗰邊慘到要住人哋地庫,每個月都入不敷支。」

Adia舉家移民加拿大之後,為咗賺錢養家乜都做,「嗰時我做過侍應,工廠,賣書。」

04年Adia一個人返香港之後,喺05年頭佢就問阿媽借咗三萬蚊,開始投機之路,更由三萬炒到而家勁賺過千萬,不過當然亦有輸嘅時候,「06年頭因為買黃金就輸返廿幾萬。」經歷11年嘅起跌,Adia學識咗資金管理,仲話想40歲前退休添!

「如果以我自己嘅定義,我2012年已經退咗休,因為我冇再做嘢,退休係我嘅定義係唔再為錢做嘢,我可以咁講唔做都有錢使。」

問到覺唔覺自己離地,Adia坦言:「我唔覺得我離地,因為每個人對退休嘅睇法唔同,睇你想要咩生活。我知有好多年輕人羨慕我,但其實我覺得任何人只要肯做一定做到。我鼓勵年輕人投資或投機,但基本嘅理財知識一定要有,投機嘅嘢千祈唔好盲衝。」

Adia又勸勉打工仔,「我都曾經搵萬二蚊人工,都可以買到樓,所以大家都得。」

對於生活,原來Adia都好慳,「我都係求其食,一餐都係幾十蚊,最多可能係話層樓貴啲,啲車靚啲。」

而家好風光嘅佢原來亦有被人睇唔起嘅時候,「其實有諗過係咪應該行呢條路,有諗過放手,再搵返份穩陣嘅工。因為嗰時好多同輩嘅人已經搵緊兩三萬一個月,自己就得萬零蚊人工。 嗰時父母,女朋友同佢屋企人都睇唔起我,好多閒言閒語。女朋友有鬧過我,都曾經因為咁離開過我。」

雖然係咁,Adia都係嗰句,投機同投資一定要做足功課,否則只會失敗收場。

撰文:何紫

攝影:金文

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載