› 選擇地區
三藩市
紐約
洛杉磯
其他美國地區
香港 台灣 北美
 

朱凱廸反低潮》潛入高鐵隧道做調查 自己記者自己做

最後更新: 0903 07:00 / 建立時間 (HKT): 0903 06:09

明日立法會選舉,其中一個新面孔,是三十八歲的朱凱廸,民調顯示他的人氣正不斷上升,究竟佢呢幾年做過乜?

香港高鐵今年年初再向財委會追加撥款,總共九百億,足夠探索太空的價錢,建一條十多分鐘的鐵路。

當大家以為,七年的反高鐵抗爭,會以「十二人包圍立法會」的淒涼場面畫上句號,朱凱廸卻在八日後,徒手爬上西九地盤一個天秤,掛上「停建高鐵」直幡:「好運嘅話,其實我哋未過撥款已經上去,但之前失敗過。」

爬天秤一役,其實並非拼上條老命向上爬咁簡單。上年年尾,港鐵開始放風話高鐵會再超資:「我仲有啲記者求真精神,如果佢要洗咁多錢,咁到底而家係點?。」

朱凱廸潛入高鐵的地獄隧道:「好惡劣,地下全部係水…..落到去通地都係口罩,你覺得個肺吸咗好多嘢入去,你就明點解咁多工人頂唔順。」

看不到南北盡頭,要搵出路,得兩個方法:一,是回到起點,抽身走人;二,在左右兩邊,無數出入口中,尋找未鎖的一個。最終他們找到個出口通向天秤,計劃了這個行動。

返上地面,香港一樣睇唔到盡頭。雨傘運動過後,非建制的各流派陷入無止境互相指責,無法凝聚力量。就算大家在網上為各件荒謬事「媽聲四起」,到實際行動,總是走晒樣。

但朱凱廸近兩年仍不斷找「未上鎖的出口」:由持續反高鐵、到反泥頭山、反領展、甚至參選區議會、立法會……朱凱廸好似從不灰心,其實只是從不抱有希望:「社會運動從來都係好邊緣嘅行為,冇所謂勝敗,只可以諗點去影響多啲人……唔可以一、兩單事就非勝不可。況且抗爭冇成本,唔使拎十萬蚊出嚟。」

在低潮時期,朱凱廸努力反低潮,親身示範,如何不要Top-down,不等所謂的領袖帶領,自己就可以在各層面爭取應得的。

自己記者自己做

首先是自己記者自己做。

曾經是明報國際版記者的朱凱廸,雖然冇揸筆搵食多年,但記者觸覺無因此生鏽,常在自己專頁上,開live為抗爭現場「做扒」,甚至自己拍片做調查報導。

朱凱廸潛入高鐵隧道,當然不止找到天秤入口咁簡單。來回地上地下幾趟,發現高鐵車廠貼住石崗軍營而建,更有一條直接通往軍營的車路。朱凱廸提出高鐵會否淪為軍用的質疑,還拍片放上面書宣傳,期望能帶起新一波反高鐵能量。

片段在網上引起不少迴響,吸引逾千人分享。亦有議員在立法會就此提出質詢。但始終沒有轉化成港人上街的理由:「而家香港人係唔信自己可以改變命運,特別喺一啲大事上面。」

大事無人理,咁小事呢?八月頭,颱風妮妲襲港,天文台掛起八號烈風訊號。有元朗新田米埔壠的村民在打風前幾日,發現離家門幾米的地方堆起了座兩層高大沙山,打大風就可能會塌,想朱凱廸幫忙搵傳媒。

「電視台同報紙嚟睇過,之後就話去到打風嗰日先出。我唔理佢哋,直接放咗個live上facebook,佢哋好唔高興,想我take-down。」對於朱凱廸來講,人命安全遠遠大過報導時機:「我話,件事唔應該等到下星期二先出街。如果我想佢哋搬走啲沙,而家就要講。」

最終,朱凱廸逼到傳媒立即跟進,而涉事的地產商在打風前一天亦派人鏟走泥沙。

地區報

其實這種自己代替主流傳媒倡議和報導議題的做法,朱凱廸過往一直有做。除了有份擔任編輯的社運網媒《獨立媒體》外,他亦曾與一班中大學生搞了份大埔地區報《埔紙》:「地區報係用嚟發展一種社群意識,例如《埔紙》幫你去確認大埔居民係個群體,呢種身份確認,係民主一個好基本嘅嘢,你有一個boundary覺得可以一齊做決定。」

《埔紙》去年年初查閱冇人睇的區議會會議紀錄,發現它打算向政府提出建設大埔墟的大型行人天橋網,若成事,將徹底破壞整個社區的構造。

《埔紙》特登搵來建築師畫模擬圖,甚至找來當年港英政府建設大埔新市填的規劃師提供意見,成功引起大埔居民強烈反對,令區議會收聲。「林村嗰個許願廣場,最後拖死咗,都係我哋開始搞起。」

把力量集中一點,即使資源和人手都極少,也可以好有力量:「如果只得《蘋果》,只講全港性嘅嘢,mold出嚟嘅人,咪只係識得關心雙普選、核心價值呢啲抽象嘢。社區嘢冇人識講。」若人人擔當自己社區的公民記者,力量想必大過得番半條人命的傳統傳媒吧。

朱凱廸 (20) 所屬新界西選區,其他候選名單包括:1黃潤達;2尹兆堅;3高志輝;4周永勤;5鄭松泰;6鄺官穩;7田北辰;8何君堯;9梁志祥;10郭家麒;11黃浩銘;12李卓人;13黃俊傑;14麥美娟;15馮檢基;16陳恆鑌;17張慧晶;18呂智恆;19湯詠芝

撰文:關冠麒
攝錄:胡智堅

相關新聞:專訪朱凱廸》無懼死亡誓改革鄉議局 放眼2018村代表選舉

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載