蘋果日報 | APPLE DAILY
› 選擇地區
三藩市
紐約
洛杉磯
其他美國地區

朱凱廸反低潮》由屋邨到立法會 由反領展到民主自決

8,260
最後更新: 0903 08:13 / 建立時間 (HKT): 0903 06:09

地區議題在港人之間能帶起的行動力,遠比「林榮基被綁」或者「篩選候選人」這些政治議題更多。朱凱廸今年嘗試以屋邨為出發點,推動民眾。

領展把東涌逸東邨街市外判給建華集團,趕絕原有小商戶,居民捱貴餸指日可待。朱凱廸同土地正義聯盟的成員就走入逸東,和部份原有商戶一起自設墟市抗領展:「我哋開咗個頭,實際上希望嗰度嘅人可以明白一個簡單道理,就是呢條邨係邊個嘅?如果佢哋相信屋邨係自己嘅,而家被人攞走,就要攞返嚟。」

朱凱廸和同伴在開檔期間被自稱「豬肉佬」同「商販」的人包圍 (部份被街坊認出是建華職員),但都被街坊們一一鬧退:「有人嚟蝦佢哋,有人嚟震壓,搵黑社會,佢哋就要反彈、反抗。呢樣嘢就係民主自決……而唔係等啲代表幫我去嘈,嘈完後件事改變,我就考慮下投票俾佢哋,等佢哋繼續可以幫自己,自己就繼續戇居居。」

朱凱廸今次參選立法會,正正就是不想香港市民繼續「戇戇居居」。朱凱廸也讓選舉團隊實現「自決」:「例如喺屯門,我一直都冇打算去觸碰水貨客問題。但我嘅屯門團隊,佢哋互相嘅Top issue,都係水貨客迫爆問題。」

朱凱廸讓地區團隊自己倡議題目:「我哋將focus放喺深圳灣大橋,其實呢類跨境基建,喺冇問過你嘅情況之下起咗,同時佢嘅開放時間同管制,社區又冇得出聲,但就要承受個負面效果。於是我哋叫社區參與,叫人投票,如果條橋係屯門迫爆源頭,我哋想它休息一下,一個星期究竟有幾多日先夠,一至四日,俾大家揀。」

他表示,當選後都會維持同樣模式:「而家嘅Team,如果係一般嘅助選團,九月四號就散。但佢哋會深化落去。」最終,是要做一個脫離過去泛民「由上而下」爭取民主的議員:「你見到民主黨而家嘅的口號仲係『有事要搵民主黨』(和08年相同),都唔關民主運動事。」

「你最大優勢係民主嘛。因為建制派好唔民主,佢哋唔發展民眾意識,想啲人越鵪鶉越好。你就應該掉轉頭,令班人越嚟越醒,越嚟越多participate,多啲叻人參與喺社會同政治工作。咁先會壯大……如果議會或者政黨嘅力量係令到個社會被推動出嚟,咁樣你唔使拉布,政府都會收檔。」

「我想大家明白,真正可以reclaim香港,令到大家生活有尊嚴嘅,唔係咩代表,而係我哋一條邨都可以有幾百人出嚟,嗰啲先係力量。」

朱凱廸 (20) 所屬新界西選區,其他候選名單包括:1黃潤達;2尹兆堅;3高志輝;4周永勤;5鄭松泰;6鄺官穩;7田北辰;8何君堯;9梁志祥;10郭家麒;11黃浩銘;12李卓人;13黃俊傑;14麥美娟;15馮檢基;16陳恆鑌;17張慧晶;18呂智恆;19湯詠芝

撰文:關冠麒
攝錄:胡智堅

相關新聞:專訪朱凱廸》無懼死亡誓改革鄉議局 放眼2018村代表選舉

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載