蘋果日報 | APPLE DAILY
› 選擇地區
三藩市
紐約
洛杉磯
其他美國地區

【自辯砌贏港鐵】馬時亨上任即票控示威者 黃浩銘單挑大狀力爭示威權

5,799
建立時間 (HKT): 1224 20:00

「我有權示威,毋須港鐵批准!」這是社民連的示威標語。當裁判官昨日裁定港鐵站長指示不合理,社民連副主席黃浩銘罪名不成立,撤銷傳票,社民連的口號竟成真。

黃浩銘今接受訪問時稱,他們多年來在港鐵站內示威,亦從未被票控,但當馬時亨上場擔任港鐵主席後,今年一連發出七張告票,「我都覺得其實幾奇怪,社民連當然首當其衝,因為我哋成日都去港鐵站抗議。」

今次控方大狀為藝人陳芷菁的丈夫張錦榮,其徒弟包括曾活躍於社運圈的葉賜豪。今次黃浩銘被票控,面對港鐵高薪騁請的大狀,他仍選擇自辯,只因想將示威者的抗辯理,由向法官和旁聽的記者原原本本陳述出來,「喺我哋咁多次去港鐵做示威時,其實當然一定會遇到啲唔鍾意我哋嘅人。我覺得其實佢哋最主要嘅關注,就係話乜港鐵係可以俾你喺度示威架咩?呢個就係討論到人權嘅問題,第27條,第39條,係寫咗保障我示威權利,表達意見嘅權利,係憲制嘅權利,呢個係好重要。」

自辯要做足功課,黃浩銘是第四次自辯,案件包括胡錦濤示威案、金鐘佔領區清場案、焚燒白皮書案,和今次的港鐵案。自辯有贏有輸,不過在金鐘清場案自辯時,控方資深大律師陳志海竟也欣賞黃浩銘的辯才,著他考慮做大律師,連法官區慶祥亦笑說同意。

「我自辯理由好簡單,我覺得第一,作為抗爭者,我哋需要用自己嘅語言,去講我哋嘅說話。另外其實我覺得都係一個鍛鍊,對於自己一個鍛鍊,我哋唔需要下下都去靠其他人,去幫我哋打官司,自己乜都唔使理咁樣。第三樣就係慳錢,因為我哋打場官司,俾嘅官司費都幾萬蚊,我希望慳得幾多得幾多,我哋荷包窄。」

黃浩銘今次雖然打勝仗,不過有份示威亦同樣被票控的馬雲祺,則在本月中被判罪名成立,罰款1,500元。其他因在港鐵站內示威而被票控的示威者,包括社運人士周諾恆、陳德章、工黨郭永健、社民連曾健成、陳文威,亦會陸陸續續上庭自辯,黃浩銘希望市民繼續關注事件,聲援這群為爭取示威權而上庭的示威者。

「我哋係愚公,我係愚公,好多人都話我哋好蠢,話我哋冇用,但唔緊要,我哋繼續做,我哋亦都會嘗試用唔同方法,自辯係其中一種。我再講一次,我歡迎港鐵如果覺得係有理據,你一定要喺限期之內快啲上訴,我就準備好晒,我奉陪到底。」

撰文︰袁慧妍
攝影︰翁少陽

相關新聞:【自辯砌贏港鐵】車費有加無減 港鐵CEO薪金最和味

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載