蘋果日報 | APPLE DAILY
› 選擇地區
三藩市
紐約
洛杉磯
其他美國地區

【領展無情】屹立柴灣40年 70歲錶行老闆捨不得街坊情

13,615
建立時間 (HKT): 0109 00:58

滴答滴答,秒針一秒一秒轉動,時間不留人。能夠屹立柴灣四十年的「連記表行」,擋得住時代洪流,卻避不過領展的魔掌、被提早收舖;70歲的老闆連援國,頓感徬徨。

「我同老婆嘅心血喺晒度,唔清貨就一鋪清袋。我細女喺網上寫咗段文,消息好快傳開,聖誕節堆滿人。朝早九點半,班老街坊等我開門,人多到塞到夜晚十點,收鋪都仲有人話要入嚟,發夢都估唔到咁犀利。」

「呢區老人家多,有啲仲唔講道理,做咗咁多年,有時都好𤷪。試過整好隻錶,客人幾年後入咗水拎番嚟話要回水。錶鋪包半年保養,點解要負責?佢唔明又唔講道理。唉,一場街坊,衰心軟幫佢再整。街坊見慣見熟,好多話我淒涼要撐我。有個阿伯買隻千幾蚊嘅錶,但用晒五十元紙幣俾錢,唔係玩嘢,係怕我冇散錢找贖俾其他街坊。街坊嘅人情味就係咁。」

「我一九四六年喺香港出世,細個讀書唔成,小六畢業,盲字唔識多隻。舅父、表哥都係做鐘錶,阿爸叫表哥介紹我入行,學門手藝,喺西環跟咗個師傅,學咗幾年,就喺太平戲院開街邊檔,當年整隻錶只係三元。六十年代,由街邊檔口搬咗入屋邨。想當年,試過前鋪後居,風雨不改咁開鋪,仔女都要幫手。」

「直至七十年代,環翠邨興建好,房署優待我,唔使競投,俾我用底價一千蚊搬入商場,我租咗兩間鋪打通,都係二千蚊租。依家,領展唔同我續租,今年六月尾就收舖。」

撰文:黎雅婷

攝錄:胡智堅

相關新聞:【領展無情】老錶行慘被趕絕 愛國老闆後悔票投民建聯

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載