蘋果日報 | APPLE DAILY
› 選擇地區
三藩市
紐約
洛杉磯
其他美國地區
馬上成為壹會員

自學設計 Capsubeans 與酒店商場合作打造品牌

Ricky分享初創作 Capsubeans的過程,「角色設計方向係性格笨笨呆呆、手短腳短,成日做啲蠢事,令人發笑,自己畫咗唔同嘅組合,最後就出現咗 Capsubeans嘅原型。」
最後更新: 0511 08:30 / 建立時間 (HKT): 0511 00:00

都市人壓力大,對一些搞笑及能抒壓的題材特別感興趣, 80後的 Ricky創辦了 Capsubeans,修讀電子工程的他,自學繪圖設計,誤打誤撞下設計出 4隻呆呆笨笨的卡通角色,意外得到市民的喜愛,亦吸引到酒店商場及不同品牌與他合作,令卡通角色曝光率增加不少。

Capsubeans的創辦人及設計師 Ricky所設計的角色,意念是希望把歡樂傳給大眾,「𠵱家 Capsubeans有 Jack、 Lily、 Max及 Charlie四個角色,佢哋係瀕臨絕種嘅外星生物,經由扭蛋機出世,頭腦唔太好,容易將事情搞砸。只要佢哋一有壓力,就會排出粉紅色嘅大便,將壓力排出,所以佢哋時常都無憂無慮。」
Ricky在英國修讀電子工程,但他無心於工程界發展,「升學揀科時冇咩心水,屋企人係做電子工程,我就揀呢科嚟讀,但讀落冇興趣,為咗畢業只好堅持,已經打算唔會喺呢行發展。 11年畢業後,我返香港搵吓有冇工作機會。」

由設計遊戲開始

當時 Ricky希望創作一些事物出來,成為自己的事業,「想整隻趣味向嘅手機 game,自己對寫 app只係有基本嘅認識,於是我睇參考書及上網學寫 programm, AI及 Photoshop繪畫都學埋,中間未有收入,就接 freelance設計工作去維持生活,但隻 game整咗年幾都唔太滿意,反而設計出一隻自己幾滿意嘅角色。」
由想推廣手機 game,變為創立 Capsubeans, Ricky表示是授權展改變了他的想法,「我諗住先推廣個角色,吸引多啲人留意,然後再開發隻 game。當時去會展舉行嘅玩具展,打算入場睇吓有冇機會同廠商傾合作出公仔,但見到隔離舉行緊授權展,行過去睇先知原來有角色授權呢回事,嗰刻好似開咗扇窗咁,令我萌生建立一個品牌嘅諗法,最後促成咗 Capsubeans嘅創立。」

參加授權展找商機

沒有太多經驗的 Ricky,先從宣傳推廣做起,希望能得到合作的機會,「開咗 facebook專頁,搵朋友整咗動畫短片及自己畫插圖擺上去 share,估唔到反應都唔錯, 1年已累積到 2萬個 like。期間自己搵廠整咗毛公仔、手機殼、貼紙等產品,我仲去參加香港、日本、台灣及美國嘅授權展。喺香港展上促成咗同柯達嘅合作,出咗相紙、相簿等精品,但其他展覽就冇咩後續,可能因為我未有太多 portfolio。」
Ricky表示在創作的過程中曾想過放棄,「新創立嘅品牌最難係畀人認識,參加外國展覽嘅費用唔低,一次大約要 3、 4萬,但結果係反應唔好,有諗過不如老老實實打番份工,但自己好勝心強,覺得開始咗件事,一定要努力做好佢為止,於是堅持落去。」

多合作機會

隨着角色為人熟悉,多了品牌找 Ricky合作,「上年都會海逸酒店搵我合作,用 Capsubeans做主題派對,有教小朋友整 Capsubeans外型嘅曲奇及房間佈置等。今年 2月, Panda Place搵我合作設計商場佈置,佢畀我嘅主題係美食及復活節,喺設計上,我會加入食物及復活蛋,商場都幾 buy個 idea,唔使點改就已經得咗,出嚟嘅效果都唔錯。」 Ricky表示現時每個項目的收費 3萬至 10萬不等。
今年 Ricky希望把 Capsubeans推廣給更多人認識,「年頭除咗同 Panda Place合作外,嚟緊仲會同 LCX合作,會有一個檔位賣 Capsubeans嘅產品;另外,今年我同飲品公司及手機 game傾成合作活動,𠵱家品牌發展叫有啲起色。長遠目標係製作 Capsubeans嘅卡通片,成為大人細路都鍾意嘅卡通角色。」

點入行?

對於想創立自家品牌的人士, Ricky認為增加品牌曝光率十分重要,「創作一個卡通人物,最好諗埋角色嘅世界設定,有一定嘅背景故事,咁會增加別人對角色嘅親切感;另外一個新角色最重要係令更多人認識,可以勇於嘗試唔同嘅方法,例如喺網絡上分享作品,及製作產品擺市集,盡量增加粉絲,呢啲會幫到你吸引品牌合作。」多了與品牌合作,現時 Ricky年薪約有 40萬。

facebook@capsubeans

撰文:曾志恒
攝影:林文樂、部分圖片由被訪者提供

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載