蘋果日報 | APPLE DAILY
› 選擇地區
三藩市
紐約
洛杉磯
其他美國地區

家居意外回憶錄|吳宛盈

4,218
建立時間 (HKT): 0910 16:30

一有怪事就賴佢嘅農曆七月終於過去,早排喺連登睇咗兩位巴打,分享農曆七月十四發生嘅家居意外,又好慘又好笑。有位巴打屋企嘅分體式冷氣,竟然同幅牆半分體,搞到佢要單手撐住部冷機,免得跌落嚟責冧下面個櫃,再用另一隻手影相po上連登求助。另一位巴打仲慘情,熟睡之際被上格床嘅好肉地細佬瞓冧張床、連把鴻運扇都責爛埋,好彩上格係打斜冧向佢對腳果邊先,總算大難不死,難得佢仲有興致影低細佬嘅無奈樣,同其他巴打開心Share,睇啲留言真係笑到碌地。



雖然唔少巴打絲打將兩件事歸咎於七月十四,但其實人年紀大會多毛病,屋都一樣,住耐咗總有啲小意外,發生果陣肯定手忙腳亂,但之後諗返就好似上咗一課,人、屋齊齊升呢。回想起中學時期同家姐share衣櫃用,有日放學放屋企,阿媽一開門神色凝重咁話:「你哋個衣櫃冧咗!」嚇到面青衝入房,但原來只係太多衫,搞到掛衫條通斷咗,道敞門幾乎逼爆啫,無冧咗咁嚴重,大家執咗成晚衫都仲笑得出。到搬出嚟住,有日晏畫突然聽到浴室傳出疑似爆炸巨響,原來洗手盆底條水喉老化爆咗,當時仲開咗熱水爐,熱水瘋狂噴出,即刻關水掣未至於變成「滾水舞間」!最好彩係當日放假,平日果個鐘數肯定返緊工,估計唔洗一粒鐘已經浸晒成座大廈……另外,狂風大雨時嘅瘋狂漏水、十號風球吹裂窗玻璃呢啲經歷都試過,究竟係咪我特別唔好彩呢?



講唔上身經百戰,都算有啲經驗,不過有兩種睇新聞見過嘅家居意外,一直令我有好大心理陰影。第一係浴室企缸浴屏爆玻璃,曾經睇報紙話有新盤浴屏裝得唔好,住戶沖沖吓涼成塊碎裂,身體多處被割傷血流如注,自此我見到浴屏個腦就不期然會loop血腥畫面,所以發誓永不裝浴屏!



至於另一樣都同洗手間有關,就係勁驚坐爆廁所!早幾年內地有個女仔去唱K,去洗手間時突然個馬桶爆裂,搞到佢嚴重受傷,諗起個畫面就覺得好恐怖!試過有裝修師傅成個人企上座廁檢查天花,我一路膽戰心驚,雖然師傅拍心口話唔會咁化學,但我都忍唔住仔細咁驗吓馬桶有冇裂痕……唔知大家又有冇啲特別嘅經驗分享呢?



樓.搜|專欄作者簡介|

吳宛盈Carol

做咗10+年電視地產記者,又窮又奄尖喺香港上車無期,幾廿歳學人尋自由玩劈炮,乜都試又睇吓會唔會餓死?

Facebook專頁: https://www.facebook.com/carolngyy

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載