蘋果日報 | APPLE DAILY
› 選擇地區
三藩市
紐約
洛杉磯
其他美國地區

【英皇重點新人】同游學修拍拖一年 氣質女神曾樂彤:我想靠自己

14,181
建立時間 (HKT): 1205 16:00

英皇娛樂重點女新人曾樂彤,未入行前係個網紅,點解佢當初會有做KOL嘅念頭?

「之前都係鋪路想做演員,讀書時有好多唔同興趣,有做好多作品,本身讀視覺藝術,本身對特技化妝又好有興趣,當年睇《Walking Dead》,然後又睇一啲外國嘅特技化妝節目,自己又鍾意去研究吓。啱啱開始拍片嗰一年,香港比較盛行,我就覺得不如俾多個藉口自己,可以經常性練習。因為如果無呢個藉口,每年就只得萬聖節先可以化呢啲妝,當時問過啲老師意見,話不如開個頻道,有人睇當然好好,無人睇嘅就當做個紀錄啦,就開始咗拍片。」

而家做藝人好難賺錢,有冇擔心收入唔夠做KOL多?

「我份人睇得比較開,因為以前做網絡,其他人都可能會覺得我搵好多錢。」

有「氣質女神」之稱嘅曾樂彤,睇上去好柔弱,其實性格爽朗,有少少固執。

「都可以咁講,難搞、固執、有自己嘅原則,睇你點樣演繹。而家無話一個目標,有咩機會嚟到就做好件事,我又唔係一個好怕輸嘅人,因為本身讀書嘅時候係想做演員,之後拍YouTube又係另外一個唔同嘅世界,YouTube同做歌手又係另外一個世界,到時真係撈唔掂嘅話,賺最低薪酬幾廿蚊咁都唔會死嘅,我覺得香港係一個只要你肯做就唔會死嘅城市。」

入行做歌手冇耐,好快就被傳媒影到同游學修拍拖,曾樂彤有啲固執嘅性格,同男朋友好夾。

「傾到偈囉,我覺得咩嘢關係都好,傾到偈好重要。」

同游學修拍拖,好快就被傳媒發現,會唔會有壓力?

「可以話係無咁大壓力,又或者係都有壓力,無咁大壓力係因為當初公開都唔係自己選擇,嗰種無壓力就係反正都已經公開咗,我就可以專注喺自己工作上嘅發展,唔使俾人追問戀情真假,可以專注工作。」

係唔係同游學修有共識,唔講咁多感情事?

「我諗始終大家都做呢一行,尤其我係新人,雖然我公司係一間大公司,但係我都唔想抹殺公司俾我嘅信任或者投資,因為我加入咗一間大公司,所以我得到目前呢啲嘢,我都會盡量做好本份,都想靠自己。」

曾樂彤啱啱推出咗首張個人EP《#meme》,入面四首歌嘅都有唔同風格,唔知大家又鍾意佢唱邊類型嘅歌呢?

攝錄:陳亦龍、蕭敬漁

髮型:Zap Tang @ Essensuals.hk

場地提供:Eat@ease(葵涌梨木道圳邊街15-19號旭逸酒店)



更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載