蘋果日報 | APPLE DAILY
› 選擇地區
三藩市
紐約
洛杉磯
其他美國地區

【首集已被盛讚】網民力捧《大帥哥》撐張衛健成最佳男主角

114,495
建立時間 (HKT): 1204 20:00

《大帥哥》開播前,睇預告見到張衛健消費《西遊記》、《小寶與康熙》金句,講真好尷尬,搞到對套劇不抱期望。點知昨晚播出一睇,唔差喎。《壹》仔話唔差已經好保守,因為網上討論區對《大帥哥》嘅熱議程度,單單第一集已經推爆咗post,有過千留言,明顯反映出套劇嘅可觀性。

究竟《大帥哥》有咩咁吸引?首先緊係男主角張衛健嘅演員魅力啦!學網民話齋,就算身邊三條o靚(洪永城、徐榮和李嘉)都高大過佢,但張衛健有嘅係氣場,舉手投足都有股魅力令人難以忽視。儘管有啲對白好無營養,不過出自佢把口就唔會覺得核突,反而好自然,而且簡單一個動作都特別有台型,例如一段口叼火柴嘅戲都寧舍有型過人。

其次,劇情簡單清楚、節奏明快,又不失驚喜。當人人都以為神枱級演員張衛健一嚟就係高高在上嘅大帥時,劇情扼要地揭曉佢只不過係小人物,令人意想不到之餘,反而更釣觀眾胃口,想快啲知佢點樣向上爬成為真正嘅大帥。唔似得台慶劇《兄弟》,玩伏線玩深度,但播咗15集都仲係散修修令觀眾睇到好混亂。

當然,《大帥哥》只係播咗一集,好定壞言之尚早,但由網民推post以至紛紛投張衛健成為「最佳男主角」嚟睇,張衛健真係好屈機!

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載