蘋果日報 | APPLE DAILY
› 選擇地區
三藩市
紐約
洛杉磯
其他美國地區

【做過外賣仔】落區巡鋪 陳家樂街市被大媽圍

4,622
建立時間 (HKT): 1206 11:30

日前,陳家樂拍攝廣告,廣告中家樂當然係飾演「超級伙計」,仲要一人分飾三角,分別係超級市場服務員、街市售貨員及餐廳侍應。喺街市拍攝時仲俾一班師奶圍玩,勁受歡迎。



講番個廣告,內容係講每當客人遇到困難時,家樂呢個「超級伙計」都會及時出現解圍,好似喺超級市場入面,一名女客人唔夠高拎沐浴露,家樂就立即現身,以一個殺死人嘅眼神兼「壁咚」,幫女客人拎咗支沐浴露落嚟,女客人即時冧豬晒;另一幕就係飾演街市售貨員,佢見到客人準備拎個爛咗嘅青蘋果,就即刻飛身換番個靚靚蘋果,細心到呢。



講到飾演「超級伙計」,家樂話小學嘅時同媽咪去一間連鎖快餐店食嘢時都遇過,「媽咪行開咗,我自己坐喺度食,但食到勁污糟邋遢,跟住有個姐姐走過嚟:『小朋友,你唔好食到咁污糟喎,你咁樣唔啱㗎喎。』我聽到就喺度喊,媽咪返嚟後問我乜嘢事,我話個姐姐話我食得好污糟,媽咪話:『啱呀!人哋咁話你係啱㗎!』然後個姐姐就過嚟同我媽咪講唔好意思:『搞喊你個仔。』媽咪話:『你啱呀!你鬧佢啦!佢真係好污糟邋遢㗎!』自此之後就好記得食嘢唔可以整到張枱污糟邋遢啦。」



家樂仲話佢其中一份暑期工係茶餐廳嘅「外賣仔」,「有一次踩單車送外賣,踩到中途突然炒車,啲奶茶倒瀉晒,得番一半,但嗰陣時勁白痴,唔識得返去茶餐廳斟過杯,就咁將嗰半杯送去俾個客,跟住個客打去茶餐廳投訴:『點解得番半杯?』,老闆仲以為我自己飲咗,哈哈。」

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載