› 選擇地區
三藩市
紐約
洛杉磯
其他美國地區
香港 台灣 北美
 

【感激周家蔚雪中送炭】蔡思貝節衣縮食 過來人楊秀惠照應一個餐兩份食

建立時間 (HKT): 0113 00:01

楊秀惠同蔡思貝唔只喺戲入面做咗好姊妹,現實中佢哋亦係共過患難嘅閨密,呢段莫逆之交,全因一餐開飯之恩而生。

以前楊秀惠捱窮慳到盡嗰陣,周家蔚同李思欣都成日請佢食飯。依家佢環境有改善,就主動幫其他人。

楊秀惠同蔡思貝未拍《大帥哥》之前,已經係朋友,但因為一餐飯,佢哋更加老友。

有日做嘢,楊秀惠見蔡思貝未醫肚,就叫埋佢一齊食飯。點知蔡思貝耍手擰頭,一時話自己唔肚餓,一時又話自己冇帶錢,作為過來人嘅楊秀惠即刻醒水,估到佢為咗慳錢,寧願唔食飯。

於是楊秀惠改口話自己個套餐好大份,請蔡思貝幫佢share。蔡思貝當堂心領神會,明白楊秀惠係幾咁體貼,大家從此更加friend,戲裡戲外都成為好朋友。

雖然佢哋兩個本身家境唔差,但入行之後都想靠自己,以前楊秀惠未做生意,一個人喺香港真係有唔少開支,所以要好慳,初出道嘅蔡思貝唔多外快賺,靠大台份人工交租、供車同生活,樣樣嘢都要計過度過。

好似楊秀惠喺facebook對艾妞呢個角色有感而發話齋,人人都想自己出身高貴,唔使睇人面色做人,有頭髮邊個想做癩痢。

依家蔡思貝收入有改善,楊秀惠生意亦愈做愈大,佢哋繼續心照,圈中都有真友誼嘅。

立即下載《壹週刊》Apps,隨時隨地睇盡時政專題、深度偵查、娛樂熱話!

按此連結: http://bit.ly/next28app

相關新聞:【一個養起三十頭家】楊秀惠捱出頭 晚晚喊住同自己講:要撐住 捱得過就唔會喊

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載