› 選擇地區
三藩市
紐約
洛杉磯
其他美國地區
香港 台灣 北美
 

【一個養起三十頭家】楊秀惠捱出頭 晚晚喊住同自己講:要撐住 捱得過就唔會喊

建立時間 (HKT): 0113 00:01

神劇《大帥哥》終於曲終人散,但好多演員憑呢個劇演技大爆發,其中演「艾妞」嘅楊秀惠,無論攪笑,抑或催淚,都做得揮灑自如,搣甩花瓶形象。

能夠將艾妞演得咁立體,其實楊秀惠嘅辛酸經歷幫唔少。

佢同朋友講,喺佢嘅舊日記裡面,有段日子,每一頁都係咁寫:,「楊秀惠,你要頂住,信自己可以捱過,唔再晚晚失控咁喊。」佢仲話永遠唔會忘記圈中好朋友周家蔚對佢雪中送炭。

楊秀惠入咗行已經14年,咪睇佢今日貴為護膚品店嘅老闆,有三十個員工跟佢搵食,又有私人助理跟身。成功背後,佢其實捱過唔少苦頭。當日一個女仔由馬來西亞離鄉別井嚟香港搵食,雖然家人喺馬拉做天花工程小生意,楊秀惠嚟香港頭七年,都係靠爸爸經濟資助,幫手交屋租,但佢唔想加重爸爸負擔,唯有瞞住屋企人,話生活其他開支自己應付到,實質係每個月身上只剩番千零蚊做飯錢。

有段日子,佢三餐縮為一餐,每日食茶記嘅下午茶特價餐,醫肚頂住。當時係佢鄰居嘅周家蔚,發現佢唔夠錢開飯要慳食,就成日搵藉口請佢食飯。喺楊秀惠心裡,呢位他鄉遇上嘅好友周家蔚,就好似「艾妞」識到有情義嘅「沅婉」一樣。

未睇到前景,又唔想屋企人擔心,所以報喜不報憂嘅楊秀惠,唯有晚晚喊住寫日記發洩,同自己對話:「唔緊要,你咁肥,依家食一餐可以減到肥。」,「你得嘅,你會捱過,終有一日你唔再晚晚喊。」

20歲入行,捱到27歲嗰年,自覺唔可以再成為家人嘅包袱,下定決心幫自己開多條出路,搏一搏!佢問爸爸借咗六位數字創業,做護膚品代理,喺銅鑼灣開上樓鋪,只請一個員工,爸爸嘅錢,佢唔可以輸,所以一邊拍劇嘅楊秀惠,每日返廠返鋪兩邊奔波,寄貨打點一腳踢。

創業頭一年,所賺嘅只夠交租同出糧,佢形容每朝瞓醒都好驚,因為做生意,每日都有好多棘手問題要面對,辛苦撐到第二年,生意漸漸上軌道,依家香港兩間鋪,另外星馬、澳門都有分店,加埋網店,34歲嘅楊秀惠,係可以一個撐起成盤生意,養起三十幾個員工,即係三十頭家嘅本事女人。佢嘅辛酸眼淚,總算冇白流。

立即下載《壹週刊》Apps,隨時隨地睇盡時政專題、深度偵查、娛樂熱話!按此連結: http://bit.ly/next28app

相關新聞:【感激周家蔚雪中送炭】蔡思貝節衣縮食 過來人楊秀惠照應一個餐兩份食

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載