› 選擇地區
三藩市
紐約
洛杉磯
其他美國地區
香港 台灣 北美
 

手持50隻債券|創業艱難 時昌迷你倉老闆低息借貸買高息債:最多都係2、3隻違約

建立時間 (HKT): 0208 13:35

「有時人唔好太死板,硬要邊到跌低,邊到起番身。你背後道風唔喺度,強求都無用。」2016年,時景恒經歷了難捱的一年。那年六月,無情的四級大火,燒毀了一幢淘大工業村。起火的位置,正正是時昌迷你倉,時景恒險些斷送事業;事業不再順風順水,然而路不轉人轉,男人四十轉身學投資,殺出一條新路。

長命大火後,揭露舊式工廈一連串消防安全問題。在新的消防指引下,時昌需大執位,部份倉庫需重整,不合資格的單位就結束生意,套現清數。迷你倉被列為高危行業,銀行亦拒絕貸款,「你同消防都未妥協,佢哋唔會借錢。就算想人借錢俾你按消防要求去改建,但已black list 你,點借?冇逼你還,已經好好。」45歲的時景恒回憶起那段日子。當年擁有過百個工廈倉的時昌,一下間結束近兩成生意,亦要面對火災後的法律責任。

相關新聞:KEYMAN TALK|從分行經理到CEO 見證股市大時代 耀才證券許繹彬:做呢行要覺得自己好窮!

學買債券

事業一瞬間走下坡,時景恒重遇老朋友,令他接觸到金融市場的投資世界。「出事後,同老朋友再見面,發現原來他已經退休,他賺的錢甚至是我九成。」細問下,發現朋友投資債券,早就獲利賺夠兼提早退休。兩年前,時景恒被高息吸引,開始研究債券(Bonds)及房地產投資信託基金(REITs)。

「為甚麼我要買bonds?因為出事後,需要資金穩定。如果去買股票,如果跌市點搞。一跌,就會坐艇。」初學投資,難免碰壁,聽朋友介紹,第一次買就買力寶,貪其大公司穩陣。「真係唔好買永久債(Perpetual bond),我覺唔著數。佢冇到期日,我110蚊買,依家跌了三成。賺到息,但套現就幫唔到手。」訪問短短,時景恒已多次強調,做投資抑或生意也好,最緊要有持續穩健現金流入,他所買的債券均為短期債券(Short-term bond),即一至三年存續期,「買到平均三至六個月內就到期,令三至六個月就有現金返。」除了賺息,當債券至到期日,他就可取回本金,方便他有足夠的資金應付生意或法律上的開支。


分散投資

時景恒表明,自己是投資界初哥,唔識揀亦唔識睇,惟有分散投資降低風險。他指,債券或房託比股市穩定,股價浮動細,相對風險水平較低。而評估債券風險相對直接,有信貸評級機構作研究,容易釐定債券的投資級別或高收益類別。「以BB級為例,過往分析指每年違約的公司只有1.6 -1.7%,如果我買50隻,最多都係2至3隻有機會違約。」他只會揀選投資評級達BB級或以上作投資,如:富力地產、新加坡Century Sunshine等,至今仍未遇上違約的公司。房託則有外國的迷你倉、領展,越秀等。

相關新聞:月入靠炒期權期指 豬仔錢罌廠商停產:無人再用硬幣儲蓄

房託6:債券4

創業容易,守業難。時景恒坦言,時昌的生意已到樽頸位,回報十分低。「零二至零三年間,物業或租金升了10至12倍,迷你倉租金升了3.5倍。其實3.5倍已經好勁,但已去到頂,因為人工已追唔到,唔係無利可圖,不過好薄利。」加上消防條例比以往嚴格,可劏的倉比以前少。當時銀行游說他賣走物業,再由私人銀行管理資產,透過槓桿即借七成半錢買債券,提高回報。「出三分一或四成錢,回報由6厘變了15厘,扣減銀行的借錢的利息,都有12厘回報。」他現在的投資組合分散至四至五個國家,再細分五至六種行業,現在持有約五十隻債券及房託股,比例為4:6,每隻投資近百萬。

拒投資磚頭

後生一代心急上車置業,時景恒寧願投資都不買樓,「我會買樓的唯一主因是為老婆及外家。」樓價太貴,他指上車要先儲一大筆錢,「如果怕樓市升,你買405、恆基都與樓市有關,都會升。」他又建議初學者而資金不多,量力而為不要借錢入市,可單買債券。在加息尾聲,不妨考慮入市。

「以前做生意都很進取、勤力,經常諗好多花神,係咪戇居?」他直言,現今租貴、人工貴、抄橋容易,創業賺大錢變相更難。傳統的富豪,未必願變賣資產或放低生意去投資債券,不過他直言,未來會投放更多在金融市場,「人愈來愈大,當然不想太辛苦。事業出了問題,我一定要變。」有冇後悔辛苦搞迷你倉?「事業同財技要結合,只做財技不行的,銀行見你只是炒炒賣賣無實業,唔會借錢俾你。」

撰文:黎雅婷

攝影:廖健昌

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載