蘋果日報 | APPLE DAILY
› 選擇地區
三藩市
紐約
洛杉磯
其他美國地區
馬上成為壹會員

【劉德華同飯堂老闆係恩人】張衛健爆臨破產邊緣 窮到冇錢食飯餐餐賒數度日

建立時間 (HKT): 0316 00:01

神劇《大帥哥》播完已經兩個月,但至今粉絲依然念念不忘。最近「大帥哥」張衛健殺入學校,向年青人分享的並非其優越成就,而是人生遇過無數的挫敗。

當天在講台上,他說:「今日我唔打算喺呢度,同大家講吓我有幾成功,因為我未係,我想同大家分享吓人生當中嘅挫折。如果我呢啲挫敗無帶住足夠嘅Passion(熱誠)去通過,我相信大家係唔會見到今日嘅大帥哥。」

54歲嘅張衛健,前半生如坐上一輛過山車,有今日成就之前,他經歷幾番大起大落。

由兒時被父親虐打、足球夢失落、一天內被三間酒廊炒魷、贏了新秀冠軍後一切不似預期,在TVB工作,窮到冇錢開飯,每次扮無帶銀包,以此賒賬度日,之後經歷由小生變棄將、咸魚翻生、破產邊緣。每一次他如何從挫折爬番起身,建立今日的張衛健。

「我相信大家喜歡大帥哥嘅其中一個原因,係因為大帥哥一生都充滿Passion,而張衞健嘅一生都係充滿咗Passion,所以我今日同大家講嘅主題係Passion呢個字。Passion可以帶俾我哋無窮勇氣、耐心同毅力,去通過人生當中嘅困難,甚至係一啲冰河時期。」

高山低谷其中一幕,是在TVB的日子。張衛健用痛苦去形容那光景。

「喺我做二打六嘅嗰段時間,我所經歷嘅痛苦,我記得當時喺TVB每個月人工大概三千五百蚊,而當時全家人嘅住屋租金已經要三千五百蚊,所以每個月都好辛苦,然後好多演員放飯嘅時候,我係無錢食飯。有時會同自己講,做一個演員,連碟頭飯都食唔起,我都幾羞愧,但我依然留喺度,係因為我對演戲充滿Passion。但Passion歸Passion,我都要食飯㗎!放飯嘅時候我可以點呢?我真係無錢,於是我就去公司餐廳,照樣叫一碟乾炒牛河、凍奶茶,食完之後埋去櫃枱俾錢,哎吔,唔記得帶銀包啊!可能留咗喺化妝間,但趕住開廠,點算好呢?然後對方就會話:『得啦得啦!』嗰位叫馬老闆,佢會話得啦得啦聽日先啦!

第二日又食完一碟豉椒牛河,又去到櫃枱,哎吔,我又唔記得帶錢,真係好無記性,佢又會話:『得啦得啦第二日先。』如是者三、四次之後,我講完唔記得帶銀包之後,馬老闆就話得喇!你唔使喺我面前做戲,我喺TVB開餐廳㗎,我日日對住嘅都係做戲嘅人,知道你無錢食飯,但我睇得出你係有前途嘅。因為TVB餐廳係承包制,佢話:『我呢間餐廳係唔可以賒賬嘅,但係因為我成日見到你喺餐廳睇劇本,我覺得你好勤力,我俾你賒賬,以後唔使再嚟櫃枱扮無帶銀包,就算唔係我坐喺櫃枱,你都可以擺明記賬,我只係俾你記賬,我相信你會有能力,有一日你會可以還到呢啲豉椒牛河嘅錢俾我,你亦都返嚟還俾我。』

當然,終於喺我努力咗八年之後,我可以做男主角,然後我還咗錢俾佢。到之後我離開TVB,隔咗好耐時間,我返去TVB宣傳Big 4演唱會嘅時候,我突然諗起呢個馬老闆,然後我走落餐廳想探佢,想同佢影張相嘅時候,佢哋話俾我聽,馬老闆死咗好多年喇!從呢件事我想同大家講,有啲人、有啲事,如果我哋要去感恩,想講一句我愛你、多謝你,我哋要及時,如果唔係就會好似我咁樣,呢個馬老闆,我再無機會感謝佢。」

安逸與憂患並存、當紅時突然一套孭飛的劇集收視大跌,他擁有的風光在瞬間化為烏有。之後跑到台灣由零開始,事業再反彈時候,他終於達成一般年青人的夢想---上樓置業!但一個金融風暴,再一次將他由高處推落深淵,去到破產邊緣。之後遇上他生命中的一個恩人劉德華,事業終於進入一個穩定期,但如他所說,人生並不因此而停止風浪,之後要面對與太太的愛情結晶胎死腹中,胞弟去年猝逝等的傷痛。

「如果問我日後生活當中,仲會唔會出現一啲重型挫折打擊,我可以百分百肯定咁講,一定會有。但我唔怕,因為我有三面免死金牌,就係三個相信,第一個相信就係我信任上天,大家都聽到我剛才嘅事例,往往我以為去到絕路嘅時候,原來仲有彎轉,原來真係柳暗花明又一村,所以我喺呢度都奉勸各位同學,我哋遇到任何事嘅時候,我哋反應可以稍稍慢少少,唔使太快憤怒、悲傷、絕望、放棄。」

撰文:Sukey LO

攝錄:吳斯金

立即下載《壹週刊》Apps,隨時隨地睇盡時政專題、深度偵查、娛樂熱話!按此連結: http://bit.ly/next28app

相關新聞:【男人最痛女友嫌你窮】張衛健提舊愛分手理由:佢話嫁俾我 唔想買LV要等半年: https://bit.ly/2FdUmq1

相關新聞:【男人最痛女友嫌你窮】張衛健提圈外舊愛分手理由:佢話如果嫁俾我 唔想買LV要等半年

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載