蘋果日報 | APPLE DAILY
› 選擇地區
三藩市
紐約
洛杉磯
其他美國地區
馬上成為壹會員

【直擊人妻的緊湊生活】女神婚後變師奶 孫慧雪趕住湊仔買漏餸 攝時間減肥狂操

建立時間 (HKT): 0422 07:00

憑《美女廚房》「阿飯」彈出的孫慧雪,是不少宅男心中的女神。16年同圈外男友Edwin結婚,17年誕下囝囝Riley,由女神變師奶,今日就等讓我們見証人妻阿雪嘅的日常生活。每朝早阿雪起身餵Riley吃早餐後,就會帶他返playgroup,但今日她交絡傭人帶囝囝上學,自己攝時間做運動!因為師奶,更加需要keep住靚。

「其實一直都有長跑,到生完小朋友之後,好多人都話我好肥,所以就搵咗個私人教練幫我訓練,趁朝早姐姐帶小朋友去playgroup嘅時候,就出嚟做運動。其實平時多數做踩單車,如果朝早唔得閒嚟嘅話,夜晚就會去跑步。喺呢度有一位好魔鬼嘅私人教練,佢會鞭策我,要我坐無影櫈,然後做一個邊跪邊行嘅動作,要不斷來回行。同時會做sit up,做好多唔同種類嘅運動,仲有舉啞鈴。」

當人母後,深深感受到這角色是萬能。「會呀。因為自小就無媽媽,所以由嫲嫲照顧,我覺得嫲嫲都好勁,因為嫲嫲年紀已經好大,我發覺就算而家三十幾歲,早知廿幾歲就要生小朋友,因為無咁多精力去同BB玩。嫲嫲照顧我嘅時候已經六十幾歲,佢仲要照顧我所有嘢,例如起居飲食,所有嘢都係佢負責,例如接送上學,甚至連勞作都要佢幫我做,自己諗番真係覺得佢好辛苦。同埋而家照顧小朋友,都唔係成日可以返屋企陪到佢,通常夜晚會抽時間同BB一齊去探嫲嫲。但覺得呢個恩無論如何都償還唔到,可以付出畀佢對我更大嘅愛。」做完運動,阿雪趕住去接BB放學返屋企,待BB午睡,她就把握一小時的時間去買餸,當媽媽後每日都好緊湊。



減老公福利

在街市,今日食乜餸的心思,一切以寶貝仔為先。「菜芯苗係用嚟煲腍剪碎俾BB食嘅,西洋菜就係買嚟煲湯嘅,然後再買啲蕃茄。」

囝囝出世後,老公的口福被大幅度削減。「BB未出世之前,我下廚更多,而家反而專注喺BB餐上,同老公反而好求其,隨便煲個湯就算。」

老公地位變次等,有冇詐型?「都有講過話好耐無食過我煮嘅餸。都有煮吓早餐俾佢嘅,但平時只會煮一個餸,以前會煮三餸一湯,但而家主力都係煮俾BB食。」

當日她為囝囝炮製豐富的BB餐。「每日都會堅持整一啲唔同嘅餸俾佢,等佢嘅食物種類多啲。通常一個餐會有一種蔬菜,一種肉類,再配搭其他色彩繽紛嘅食材,等佢見到開心啲。番茄會用嚟整啲蕃茄茸,同埋可以用嚟煲湯,一物兩用。」好多人話,女人結咗婚生埋BB,就好易冇咗自己嘅人生,阿雪又點睇呢?「睇吓你鍾唔鍾意呢種生活,但真係好忙,我覺得自己無咗休息時間,因為要一邊工作,一邊要照顧小朋友,同埋屋企無老人家幫手,因為佢哋年紀都好大,覺得要佢哋照顧小朋友會好辛苦,所以都係自己照顧。變咗以前收工返屋企可以攤喺床上,而家就要再兼顧埋小朋友。」



最想老公變肥佬

女神降呢做師奶,呢個反差咁大,阿雪一開始就接受嗎?「因為我從來都唔覺得自己係女神,所以都接受到嘅,一向都係咁樣,小時候已經成日同嫲嫲去街市,所以都覺得無問題。變咗師奶都唔緊要,最緊要keep住靚就得。」老公會唔會好擔心你變咗師奶?「我諗佢應該鍾意㗎,佢個人好怪。」當上師奶,原來她也渴望老公都變住家男身形。「如果佢變成一個肥佬,我就有多啲安全感。」



養兒開支大

阿雪坦言,在孩子身上的開支很大。「好多呀,因為佢而家嘅年紀可以讀playgroup,而家啲playgroup都差唔多要四、五千蚊一個月,然後買俾佢食嘅嘢,除咗菜,連肉類都想係有機嘅,但價錢好貴,開支都好大,所以都要俾心機工作。每次有人問幾時生第二個,我哋都會話搞掂呢個,儲多啲錢先啦,真係搞唔掂。例如佢唔舒服,每次睇醫生都好貴。」說罷發現自己買漏餸,阿雪又匆匆拆返街市樓上補貨。「好似漏咗豬骨喎,我哋上番去買,唔好意思,我成日都係咁樣,然後我就要行幾轉,當減肥啦!」

此刻的阿雪,歸心似箭,摩打腳的腳步,記者也追到索氣。「因為BB應該差唔多起身,如果佢見唔到我會唔開心,所以要快啲返去。我每日就係咁樣行呢條斜路至少兩三次,一定會瘦,不過會行到大髀粗晒。」

回家後,時間啱啱好,囝囝睡飽飽起身,証明阿雪平日湊仔很少假手於「傭人」。

「而家我帶佢去公園放電,佢最鍾意玩bubble,因為有呢個bubble,就會有好多朋友,我帶晒佢所有波波出嚟,佢最鍾意。」一個女神,被囝囝完全征服。



預咗自己係呷醋奶奶

肉緊媽咪原來現在已幻想囝囝長大後,有拍拖生活,自己會呷醋。「我有諗呀,老公叫我記得唔好呷醋。當佢大個拍拖,或者唔睬我嘅時候就會唔開心,因為佢而家好需要你,突然有一日佢唔要你,我諗會好空虛。」

放手這個課題,是每個媽媽將來要學習。「我都覺得好難,覺得好似俾人搶咗去咁樣。我哋已經想像晒佢大個會駁嘴,叫大家唔好傷心,互相安慰,同埋有定心理準備。」

策劃:肥A

攝錄:黃志明、吳斯金

相關新聞:【為贏毛公仔可以去到幾盡】老公去嘉年華出力拍 孫慧雪為幫囝囝掩耳保護

「壹起出手,撐新聞自由!」
立即免費訂閱《壹週刊》

登記成為壹會員,睇盡獨家內容,會員活動!

http://bit.ly/NextSubscrition30

【逐步教學】立即登記訂閱《壹週刊》! 免費無阻睇盡全部精彩內容

http://bit.ly/2WYFZvA

相關新聞:【曾公開叫老公收X?】孫慧雪撇低個仔拖老公買傢俬

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載