› 選擇地區
三藩市
紐約
洛杉磯
其他美國地區
香港 台灣 北美
 

【捲土重來?】因兄弟不和而散band? Mr:當時大家都已經清袋,唔適合一齊去創作

建立時間 (HKT): 0424 16:00

想當年,Mr五子包括主音歌手Alan(布志綸)、節奏結他手Ronny(黎澤恩)、主音結他手MJ(譚傑明)、貝斯手Dash(譚健文)及鼓手Tom(杜志烜)一出道就深得樂迷愛戴。一首《如果我是陳奕迅》更加唱到街知巷聞,多騷唱之餘又多商品代言,前途無限。可惜,15年底,Mr同唱片公司理念有分歧,加上有傳樂隊成員不咬弦,Mr暫停合作,各自各發展,究竟佢哋呢幾年分別搞過啲咩呢?Ronny:「我有拍戲同拍劇,又有教結他同健身,所以都有其他唔同發展。」Alan:「除咗Mr.之外,仲有發表一啲個人作品,其實同音樂一直都息息相關,又有演舞台劇、拍戲,稍後又會拍劇,所有嘢都同幕前幕後有關,因為自己嘅作品,大部分都係親自負責監製、作曲同填詞。另外都有同朋友做一門生意,因為始終而家音樂好難做。」Dash:「我就啱啱做咗爸爸,個女今年半歲,呢樣嘢對我嚟講都係一個好大嘅轉變。另外工作方面,一年前加入英皇唱片擔任唱片製作。」Tom:「一直以嚟都有教打鼓,呢幾年管理緊自己公司,一邊教人打鼓,同時學緊點樣營運公司。因為我哋夾band咁多年,我諗亦都係大家最鍾意嘅事情,雖然各自有做其他唔同職業,但工作賺錢養家其實好辛苦,所以一直學習點樣將呢樣嘢成為一種動力同興趣,而家都係咁樣。」MJ:「有段時間有教結他,有段時間亦有學習做音樂嘅過程,因為最初大概八年時間,每次錄音只係攞支樂器去錄就算,但其實點樣製作我哋都無參與太多同留意。」

有冇諗過,如果當初冇離開環球,兄弟間冇不和,Mr嘅發展可能已經更上一層樓?Dash話:「樂隊名稱Mr.即係平凡人,一直創作以嚟都係以平常心,唔係話想要去爭取咩嘢獎項。不過大家可能覺得我哋呢幾年停咗,有段時間唔知我哋去咗邊,但其實係一個好好機會,俾大家可以有各自發展之餘,仲可以吸引更多內容放喺音樂上,因為一直做幕前,keep住寫歌出碟,其實對自己生活無乜特別睇法。」Alan補充:「我好認同佢嘅講法,因為你唔會知道將來發生咩嘢事,就算喺嗰段時間好刻意去做一啲事,我覺得都未必可以幫我哋更上一層樓,分分鐘再跌落幾層都得。因為當時大家都已經清袋,即係喺創作靈感上,大家唔係好適合一齊去創作,所以有段時間大家係需要去嘗試唔同嘢,去吸收一吓。樂隊入行咁多年,經歷過不同事情,我諗對大家都需要時間休息去緩充,否則我哋仍然有種執着嘅話,對大家都唔係一件好事。」地球係圓嘅,19年1月,Mr五子再走埋一齊,出新歌《釋放自己》,同時宣布5月17、18喺紅館開個唱,係唔係意味住Mr會keep住合體繼續行落去?Alan代表樂隊答:「是否繼續行落去係未知數,始終Mr.仍然會存在,但模式係咪一定要好似以前咁樣呢?我諗大家都唔會想好似以前嗰種方式,我哋而家係一隊獨立樂隊,以獨立形式運作,亦都互相尊重對方而家需要嘅工作,所以大家嘅關係,一定會比幾年前更好。」

攝錄:黃志明

「壹起出手,撐新聞自由!」
立即免費訂閱《壹週刊》

登記成為壹會員,睇盡獨家內容,會員活動!

http://bit.ly/NextSubscrition30

【逐步教學】立即登記訂閱《壹週刊》! 免費無阻睇盡全部精彩內容

http://bit.ly/2WYFZvA

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載