› 選擇地區
三藩市
紐約
洛杉磯
其他美國地區
香港 台灣 北美
 

【零生意拒執笠】港姐陳慧儀救食品工場做埋揸車送貨:最擔心員工冇出路

建立時間 (HKT): 0524 00:01

離婚後任財經主持

港姐出身的陳慧儀,雖然多年來徘徊娛圈邊緣,但她行的並非一般傳統港姐人生軌跡。

陳慧儀89年參選港姐,跟陳法蓉同屆,雖未獲任何獎項,但卻給鄭丹瑞睇中,簽約成為他電影公司藝人,拍了幾部電影和電視劇後,便跟導演陳嘉上閃婚,結婚幾年,小女兒三歲,兩人便告仳離。而60歲前夫早前跟內女星夏沫僑再婚,細他三十年的嫩妻為他誕下一女。

當年,3字頭的陳慧儀帶着一對子女開創人生另一頁,沒有重返娛樂圈,曾經從事金融業的她,一邊攻讀大學課程,一邊任財經節目主持,與此同時,她又跟陳永陸拍檔在電台開咪。16年,她自言已經做得差不多,是時候要結束。其後,她又在完全不同的範疇重新起步。

教啫喱花有數千學生


原來,突然愛上造啫喱花的她,飛去不同地方拜師學藝,甚至試過一日來回越南上大師班的課。未幾,她也開班教授啫喱花技藝,數年來有過數千名學生。喜歡學新嘢,18年,陳慧儀決定投資食品工場,邊學邊做,跟不少酒店和大企業合作。

她自言一直打順境波,到疫情突然來襲,食品工場有接近兩個月零生意,她說:「農曆新年過後,消息就排山倒海咁嚟,好多行家問我有咩打算,係咪會停薪留職定減人工,之後,又聽到比較大規模工廠直情要停工,跟住有酒店結束。我當時同員工講,叫佢哋畀啲時間我諗方法。」

全球面對經濟困境,陳慧儀試過在夜深人靜時問自己:「應該點樣度過呢個難關?如果要停廠,我覺得不如索性結業,但我又覺得情況未去到咁差,雖然當時係零生意額。如果停業,就應該唔會再重開,我唔想一班員工無所適從。」

陳慧儀說,任何人都會打順境波,遇上逆境波,她坦言未試過,她很想試一吓。

「呢行好景時,員工無離棄我,無理由喺呢啲時候先宣佈結業,巿道咁差,佢哋可以搵咩工作呢?」她說。

揸車送貨將軍澳


食品工場一直主力做批發生意,她之前因個人喜好,任性地做過幾批貓山王蛋糕,反應極好,不過本大利小,實非生意之道。但既然要開拓零售,她決定再推出這款榴槤蛋糕,結果母親節期間,每天要出三部車送貨,甚至要她揸車去送。

「因為人手不足,由朝送到晚,所以無辦法唔親自送貨,而且我鍾意接觸客人,坦白講,我又唔覺辛苦。我仲可以同客傾吓,知道佢哋意見,試過有次我送貨去將軍澳,有個客落嚟攞蛋糕,開心到不得了,根本冇理個蛋糕,只係不停話靚女。如果送貨係平日嘅 司機哥哥,佢哋唔會反映意見。」

每日回覆二百個短訊


直接接觸顧客,陳慧儀更會親自回覆WHATSAPP,每天大概有百多二百個詢問短訊,她通常都會自己先回答。一日工作不少過十小時,但她並不覺累。

「今次反而令我哋有時間研發一啲SUPERFOOD食物,好似苔麩,味道好難食,但好有營養,我同師傅研究咗好耐,又向專業人士攞意見,終於造咗一個好好味苔麩卷蛋,因為係健康食品,好多媽咪都好放心畀小朋友食,尤其是對食物有敏感。我覺得造一款食物出嚟,除咗味道好,營養價值都同樣重要。」她說。

生意有零的突破後,生意額開始反彈,她沒有期望太多,也不會想往後有甚麼事會發生。

「坦白講,我屬於非常好彩一羣,但亦咁樣講,我會長期保持樂觀同正面態度工作,唔會太悲觀。」她說。


----------------------------

壹呼百應 號召有心人 請香港人睇壹週刊

按此了解更多

----------------------------

APP 內訂閱 《壹週刊》

1Click 搞掂 輕鬆簡便

按此了解更多

-----------------------------

【《壹週刊》昔日紙本檔案庫】

30年壹仔經典 壹壹重現!

更多 壹週刊 文章

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載